பணி நிரந்தரம் செய்ய கோரி மின் ஊழியர்கள் 'ஸ்டிரைக்'

உடுமலை மின் பகிர்மான வட்டத்திலுள்ள, ஒப்பந்த தொழிலாளர்களை நிரந்தரப்படுத்தக்கோரி, வேலை நிறுத்த போராட்டத்தில் ஈடுபட்டுள்ளனர்.மின் வாரியத்தில் கேங் மேன் பதவிக்கு, நேர்முகத்தேர்வு நடத்துவதற்கான பணிகளில் ஈடுபட்டுள்ளது. ஏற்கனவே பணியாற்றி வரும், ஒப்பந்த தொழிலாளர்களை நிரந்தரப்படுத்த வேண்டும் என கோரி, அவர்கள் வேலைநிறுத்த போராட்டத்தில் ஈடுபட்டு வருகின்றனர்.உடுமலை மின் பகிர்மான வட்டத்திலுள்ள, உடுமலை, பொள்ளாச்சி, அங்கலக்குறிச்சி கோட்டத்தைச்சேர்ந்த, 110 தொழிலாளர்கள், கடந்த நான்கு நாட்களாக வேலை நிறுத்த போராட்டத்தில் ஈடுபட்டு வருகின்றனர்.நேற்று மேற்பார்வை பொறியாளர் அலுவலகத்தில் மனு அளித்தனர்.அம்மனுவில் கூறியுள்ளதாவது : பல ஆண்டுகளாக குறைந்த ஊதியத்தில், பணி நிரந்தரமாகும் என்ற நம்பிக்கையில் பணியாற்றி வருகிறோம். கம்பம் நடுதல், மின் வழித்தடம் அமைத்தல், மின் தடை சரி செய்தல் என அனைத்து களப்பணிகளும் செய்து வருகிறோம்.ஒப்பந்த பணியாளர்களுக்கு அறிவிக்கப்பட்ட, தினக்கூலி, 380 ரூபாய் வழங்கப்படுவதில்லை. புதிய பணியிடத்திற்கு அறிவிப்பால், ஒப்பந்த தொழிலாளர்கள் வாழ்வாதாரம் பாதித்துள்ளது.எனவே, பல ஆண்டுகளாக மின் வாரியத்தில் பணியாற்றி வரும் ஒப்பந்த தொழிலாளர்களை நிரந்தரப்படுத்த வேண்டும்.இவ்வாறு, அம்மனுவில் தெரிவித்துள்ளனர்.