சூரிய கிரகணத்தை பார்வையிட்ட மக்கள்: அறிவியல் கழகத்துக்கு பாராட்டு

உடுமலை, சுற்றுப்பகுதியில் அறிவியல் கழகத்தின் சார்பில் பாதுகாப்பான முறையில் சூரிய கிரகணத்தை பொதுமக்கள் பார்வையிட்டனர்.தமிழகத்தில் நேற்று நிகழ்ந்த பகுதி நேர சூரிய கிரகணத்தை, பாதுகாப்பாக பார்வையிடுவது குறித்து, உடுமலை கலிலியோ அறிவியல் கழகத்தின் சார்பில், 'ஆன்லைன்' பயிற்சி பட்டறை நடந்தது. நேற்று காலை 10.17 மணிக்கு துவங்கிய, கிரகணத்தின், பல்வேறு படிநிலைகளை தொலைநோக்கி மூலம் மாணவர்கள் பார்க்க ஏற்பாடு செய்யப்பட்டிருந்தது. நேற்று காலை வானம் மேகமூட்டத்துடன் காணப்பட்டாலும், சிறிது நேரத்தில், கிரகண நேரத்தில், வானம் தெளிவாக மாறியதால், உடுமலை பகுதியில், இந்நிகழ்வு ஒரளவு தெளிவாக காண முடிந்தது.சூரிய கிரகணத்தை சூரிய கண்ணாடிகள் மூலமாகவும், பந்து கண்ணாடி, ஊசித்துளை கேமரா, ஜல்லடை மற்றும் தொலைநோக்கி மூலம் சூரியனின் பிம்பத்தை விழச்செய்து உற்று நோக்குவது குறித்து செயல்முறை விளக்கம் அளிக்கப்பட்டது.வானியல் நிகழ்வுகளை உற்றுநோக்கிய புகைப்படங்களை கலிலியோ அறிவியல் கழகத்துக்கு அனுப்பிய மாணவர்களுக்கு சான்றிதழ் வழங்கப்படும் போட்டியும் நடந்தது.உடுமலையில், கலிலியோ அறிவியல் கழகத்தின் சார்பில், காந்தி நகர் விநாயகர் கோவில் விளையாட்டு மைதானத்தில் கிரகணத்தை பொதுமக்கள் மற்றும் மாணவர்கள் பார்வையிட ஏற்பாடு செய்யப்பட்டது.பொதுமக்கள் சமூக இடைவெளிவிட்டு, தொலைநோக்கி மூலம் கிரகணத்தை பார்வையிட்டனர். கோவை எஸ்.என்.எம்.வி., கலை மற்றும் அறிவியல் கல்லுாரி இயற்பியல் துறை, கல்லுாரி அறிவியல் மன்றம் இணைந்து, உடுமலை அரசு கலைக் கல்லுாரி அருகே ருத்ரப்ப நகரில் உள்ள மைதானத்தில் ஏற்பாடு செய்யப்பட்டது.எஸ்.என்.எம்.வி., கல்லுாரி முதல்வர் சுப்ரமணியம் 'ஆன்லைன்' மூலம் நிகழ்ச்சியை துவக்கி வைத்தார். இயற்பியல் துறைத் தலைவர் லெனின்பாரதி, சூரிய கிரகணம் குறித்து பொதுமக்களுக்கு விழிப்புணர்வு ஏற்படுத்தினார்.இரண்டு பகுதிகளிலும் கிரகணத்தை காண வந்த பொதுமக்களுக்கு சூரிய வடிகட்டி கண்ணாடிகள் வழங்கப்பட்டன. அதன் மூலம், பொதுமக்கள் வானியல் நிகழ்வை கண்டு ரசித்தனர். இத்தகைய நிகழ்வுகளால், மாணவர்களுக்கு, வானியல் குறித்த விழிப்புணர்வு ஏற்படுவதுடன், ஆர்வமும் அதிகரிக்கிறது.