Latest News

பருவ மழையால் தீவிரமடையும் நெல் சாகுபடி: தரமான விதை வழங்க அறிவுரை

நெல் சாகுபடிக்கு தட்டுப்பாடு இல்லாமல், தரமான விதைகள் வினியோகிக்க வேண்டும், என அதிகாரிகளுக்கு அறிவுறுத்தப்பட்டது.தென் மேற்கு பருவ மழை காரணமாக, அனைத்து மாவட்டங்களிலும் நல்ல மழை பெய்துள்ளது. குறிப்பாக, நெல் சாகுபடி அதிகளவு மேற்கொள்ளப்படும், காவிரி டெல்டா பாசனத்திற்கு, மேட்டூர் அணையிலிருந்து தண்ணீர் திறக்கப்பட்டுள்ளதால், அனைத்து விவசாயிகளுக்கும், தரமான விதைகள், தட்டுப்பாடு இல்லாமல், விதைச்சான்று துறையால், சான்றழிக்கப்பட்ட விதைகள் உற்பத்தி மற்றும் இருப்பு குறித்து ஆய்வு மேற்கொள்ளப்பட்டது.உடுமலை, தாராபுரம் பகுதியிலுள்ள, தனியார் விதை சுத்தி நிலையங்களில், விதைச்சான்று துறை இணை இயக்குனர் ராஜேந்திரன், திருப்பூர் மாவட்ட உதவி இயக்குனர் மாரிமுத்து உள்ளிட்ட அதிகாரிகள் ஆய்வு செய்தனர்.ஆய்வின் போது, சம்பா பருவத்திற்கு ஏற்ற, நீண்ட கால நெல் ரகங்களான, சி.ஆர்.,1009; பிரிவு 1, 140 முதல் 155 நாட்களை சாகுபடி காலமாக கொண்ட, வெள்ளைப்பொன்னி, மத்திய கால நெல் ரகங்களான, ஏ.டி.டி.,38, 39, ஐ.ஆர்.,20, டி.கே.எம்.,13, பி.பி.டி.,5204, ஏ.டி.டி.,(ஆர்)46, சி.ஓ.,43 ஆகிய ரகங்களை கால தாமதம் இல்லாமல், விதை சுத்தி செய்தும், அதிகாரிகள் ஆய்வு செய்து, விரைவில் சான்று வழங்க வேண்டும். விதைச்சான்று நடைமுறை மற்றும் விதைச்சட்டங்களையும் முறையாக பின்பற்ற வேண்டும், என அதிகாரிகளுக்கும், தனியார் விதை சுத்தி நிலைய உரிமையாளர்களுக்கும் அறிவுறுத்தப்பட்டது.விதைச்சுத்தி நிலையங்களில் இருப்பில் உள்ள வயல்மட்ட விதைகள் பராமரிப்பு, விதைக்குவியல்கள், சான்று அட்டை பொருத்திய விதைக்குவியல்கள், மிதவை பரிசோதனை மற்றும் எடையளவு ஆகியவை ஆய்வு செய்யப்பட்டது.